ഹോണ്ട എലിവേറ്റ് ഫെയ്‌സ്‌ലിഫ്റ്റ് ഉടൻ; എസ്‌യുവിയിൽ വരുന്നത് ഈ മാറ്റങ്ങൾ

ഹോണ്ട എലിവേറ്റ് ആരാധകർക്ക് സന്തോഷവാർത്ത. ജാപ്പനീസ് വാഹന നിർമാതാക്കളായ ഹോണ്ട തങ്ങളുടെ ജനപ്രിയ എസ്‌യുവിയായ എലിവേറ്റിന്റെ ഫെയ്‌സ്‌ലിഫ്റ്റ് പതിപ്പ് അവതരിപ്പിക്കാനുള്ള ഒരുക്കത്തിലാണ്. ഇന്ത്യയിലും വിദേശത്തുമായി നിരവധി തവണ പരീക്ഷണയോട്ടത്തിനിടെ പുതിയ മോഡൽ കണ്ടെത്തിയിരുന്നു. ഇപ്പോൾ വാഹനം ലോഞ്ചിന് പൂർണമായും തയ്യാറായെന്നാണ് റിപ്പോർട്ടുകൾ. സെപ്റ്റംബർ അവസാനമോ ഒക്ടോബർ ആദ്യമോ പുതിയ ഹോണ്ട എലിവേറ്റ് ഫെയ്‌സ്‌ലിഫ്റ്റ് ഇന്ത്യൻ വിപണിയിലെത്തുമെന്നാണ് സൂചന. നിലവിലെ മോഡലിൽനിന്ന് വലിയ മാറ്റങ്ങളുണ്ടാകില്ലെങ്കിലും ഡിസൈനിലും ഫീച്ചറുകളിലും ശ്രദ്ധേയമായ പരിഷ്‌കാരങ്ങൾ പ്രതീക്ഷിക്കാം.

ഡിസൈനിൽ ചെറിയ മാറ്റങ്ങൾ

ഫെയ്‌സ്‌ലിഫ്റ്റ് മോഡലായതിനാൽ എലിവേറ്റിന്റെ അടിസ്ഥാന രൂപകൽപ്പനയിൽ വലിയ മാറ്റമുണ്ടാകില്ല. നിലവിലെ ബോക്‌സി രൂപം തുടരും. എന്നാൽ മുൻവശത്ത് പുതിയ ഗ്രിൽ, പരിഷ്‌കരിച്ച ബമ്പർ, ചെറിയ മാറ്റങ്ങളുള്ള ഹെഡ്‌ലാമ്പുകൾ എന്നിവ ലഭിച്ചേക്കും. എൽഇഡി ഹെഡ്‌ലാമ്പുകളും ഫോഗ് ലാമ്പുകളും തുടരുമെന്നാണ് പ്രതീക്ഷ. സൈഡ് പ്രൊഫൈലിൽ പുതിയ അലോയ് വീലുകളും പിന്നിൽ പുതുക്കിയ ടെയിൽലാമ്പ് ഡിസൈനും ലഭിച്ചേക്കാം.

അകത്തളത്തിലും പുതിയ ഫീച്ചറുകൾ

ക്യാബിൻ കൂടുതൽ ആധുനികവും പ്രീമിയവുമാക്കാനാണ് ഹോണ്ടയുടെ നീക്കം. ഡാഷ്‌ബോർഡിന്റെ അടിസ്ഥാന ലേഔട്ടിൽ വലിയ മാറ്റമുണ്ടാകില്ലെങ്കിലും പുതിയ കളർ തീമുകളും കൂടുതൽ സൗകര്യങ്ങളും എത്തും. വെന്റിലേറ്റഡ് സീറ്റുകൾ, 360 ഡിഗ്രി ക്യാമറ, പരിഷ്‌കരിച്ച ഇൻഫോടെയ്ൻമെന്റ് സംവിധാനം തുടങ്ങിയവ പുതിയ എലിവേറ്റിലെ പ്രധാന കൂട്ടിച്ചേർക്കലുകളായേക്കും. നിലവിലെ മോഡലിൽ 10.25 ഇഞ്ച് ടച്ച്‌സ്‌ക്രീൻ, 8 സ്പീക്കർ സൗണ്ട് സിസ്റ്റം, വയർലെസ് ചാർജർ, 7 ഇഞ്ച് സെമി-ഡിജിറ്റൽ ഇൻസ്ട്രുമെന്റ് ക്ലസ്റ്റർ, കീലെസ് എൻട്രി, പുഷ്-ബട്ടൺ സ്റ്റാർട്ട് തുടങ്ങിയ ഫീച്ചറുകളുണ്ട്.

എൻജിനിൽ മാറ്റമുണ്ടാകില്ല

പവർട്രെയിനിൽ വലിയ മാറ്റങ്ങൾക്ക് ഹോണ്ട തയ്യാറെടുക്കുന്നില്ലെന്നാണ് റിപ്പോർട്ടുകൾ. നിലവിലെ 1.5 ലിറ്റർ, 4 സിലിണ്ടർ നാച്ചുറലി ആസ്പിറേറ്റഡ് ഐ-വിടെക് പെട്രോൾ എൻജിൻ തുടരും. ഈ എൻജിൻ 121 ബിഎച്ച്പി പവറും 145 എൻഎം ടോർക്കും നൽകുന്നു. 6 സ്പീഡ് മാനുവൽ, സിവിടി ഓട്ടോമാറ്റിക് ഗിയർബോക്‌സ് ഓപ്ഷനുകളും തുടരും.

സുരക്ഷയിലും ശ്രദ്ധ

സുരക്ഷയ്ക്കായി ആറ് എയർബാഗുകൾ, എബിഎസ്, ഇബിഡി എന്നിവയ്ക്കൊപ്പം ക്യാമറ അധിഷ്ഠിത അഡ്വാൻസ്ഡ് ഡ്രൈവർ അസിസ്റ്റൻസ് സംവിധാനവും ലഭിക്കും. ഹോണ്ടയുടെ സെൻസിങ് സാങ്കേതികവിദ്യയും പുതിയ മോഡലിൽ തുടരുമെന്നാണ് പ്രതീക്ഷ.

എതിരാളികൾ ആരൊക്കെ?

2023ൽ പുറത്തിറങ്ങിയതിന് ശേഷം എലിവേറ്റിന് വലിയ അപ്‌ഡേറ്റുകളൊന്നും ലഭിച്ചിട്ടില്ല. നേരത്തെ ഇലക്ട്രിക്, ഹൈബ്രിഡ് പതിപ്പുകൾ അവതരിപ്പിക്കാൻ ഹോണ്ട പദ്ധതിയിട്ടിരുന്നെങ്കിലും ഈ നീക്കങ്ങൾ നിലവിൽ മാറ്റിവച്ചിരിക്കുകയാണ്. മാരുതി ഗ്രാൻഡ് വിറ്റാര, ഹ്യുണ്ടായ് ക്രെറ്റ, കിയ സെൽറ്റോസ്, സ്കോഡ കുഷാഖ്, ഫോക്‌സ്‌വാഗൺ ടൈഗൺ തുടങ്ങിയ മിഡ്-സൈസ് എസ്‌യുവികളോടായിരിക്കും പുതിയ എലിവേറ്റ് ഫെയ്‌സ്‌ലിഫ്റ്റിന്റെ പ്രധാന മത്സരം. നിലവിലെ മോഡലിനോട് അടുത്ത വിലയിൽ പുതിയ പതിപ്പ് എത്തുമെന്നാണ് പ്രതീക്ഷിക്കുന്നത്.